Daşkənddəki Azərbaycan Mədəniyyət Mərkəzində sənət kursları

Azərbaycanın Özbəkistandakı səfirliyinin nəzdindəki Heydər Əliyev adına Azərbaycan Mədəniyyət Mərkəzində rəqs, rəsm, kompyuter, Azərbaycan dili kursları ilə yanaşı, "Əl işləri və naxış tikmə" kursu da fəaliyyətə başlayıb.

Qədim ənənələrə malik olan Azərbaycan tikmə sənətinin təsvir vasitəsi olduqca zəngin və rəngarəngdir. Burada müxtəlif növ sap, parça, muncuq, pilək və s. bədii materiallar, bəzək əşyaları, hətta qiymətli daş-qaşlardan geniş istifadə edilir.

Kursları Özbəkistanın "Barkamal avlod" uşaq ədəbi mərkəzinin müəlliməsi, "Bazarart" sərgi yarmarkasının təşkilatçılarından olan Dildora Şoraxmedova aparır. Kurslarda Azərbaycan motivləri və naxışlarına, habelə bəzək elementlərinə daha çox üstünlük verilir. Mədəniyyət Mərkəzinin kitabxanası kurslarla bağlı müvafiq əyani vəsait, kitab və nəşrlərlə təmin olunub.

Qeyd edək ki, kurslara qəbul aparmaq üçün Daşkənddə azərbaycanlıların daha çox təhsil aldığı Mirabad rayon 147 saylı orta məktəbdə elanlar verilib, qruplar təşkil edilib. Kurslar ödənişsizdir, sonda yaxşı nəticə göstərənlərə Mərkəzin sertifikatı veriləcək, gələcəkdə onların sərgiləri təşkil ediləcək.

Mədəniyyət.- 2013.- 12 iyun.- S. 4.